پاکستان کے معروف گلوکار عاطف اسلم کا کہنا ہے کہ مجھے بھارت میں کام کرنے کی کمی محسوس نہیں ہوتی، البتہ مداحوں کی یاد آتی ہے۔
حال ہی میں عاطف اسلم نے بھارتی یوٹیوب چینل کو ایک انٹرویو دیا، جہاں انہوں نے بھارت کے ساتھ اپنے تعلق اور وہاں موجود مداحوں سے وابستگی کے بارے میں کھل کر بات کی ہے۔
حالیہ انٹرویو میں بات کرتے ہوئے عاطف اسلم نے کہا کہ بھارتی حکومت نے سوچا کہ ہم پاکستان سے آنے والے فنکاروں پر پابندی عائد کر سکتے ہیں، میں بھی اس پابندی کا شکار ہوں اور گزشتہ 10 سال سے میں نے بھارت کے لیے کوئی گانا نہیں کیا۔
عاطف اسلم نے کہا کہ پابندی کے باوجود میری موسیقی متبادل ذرائع کے ذریعے بھارت میں مداحوں تک پہنچ رہی ہے، میرے مداح وی پی این وغیرہ کے ذریعے میری موسیقی سن رہے ہیں۔
گلوکار نے واضح کیا کہ مجھے بھارت میں پیشہ ورانہ طور پر کام کرنے کی کمی محسوس نہیں ہوتی بلکہ وہاں کے لوگوں اور اپنے مداحوں کی یاد آتی ہے۔
