وزیراعظم شہباز شریف کا کہنا ہے کہ مکہ معاہدے کا مقصد قطعی جارحیت نہیں ہے، یہ معاہدہ تینوں ملکوں کے درمیان خطے میں امن، سلامتی، خوشحالی کیلئے ہے۔
وفاقی کابینہ کو اجلاس میں بریفنگ کے دوران وزیراعظم شہباز شریف نے بتایا کہ مکہ معاہدہ پاکستان اور سعودی عرب کے درمیان معاہدے کی توسیع ہے، پاکستان، سعودی عرب، ترکیہ دفاعی معاہدہ پہلے سے موجود تعاون کا تسلسل ہے، پاکستان اور ترکیہ کے درمیان دہائیوں پر محیط تعاون موجود ہے، حرمین شریفین کے تحفظ کی ذمہ داری پاکستان کے عوام اور افواج کے لیے اہم فریضہ ہے۔
وزیر اعظم نے کہا کہ آزاد کشمیر الیکشن میں عوام نے پاکستان مسلم لیگ ن پر اعتماد کا اظہار کیا، پہلے دو مراحل میں مسلم لیگ ن کو کامیابی ملی، آزاد کشمیر کے انتخابی نتائج قائد مسلم لیگ ن نواز شریف پر عوام کے اعتماد کا مظہر ہیں، آزاد کشمیر کے عوام کی طرف سے اعتماد کے اظہار پر مشکور ہیں۔
انہوں نے کہا کہ بعض عناصر نے آزاد کشمیر کے حالات جان بوجھ کر خراب کرنے کی کوشش کی، مسائل کا حل بات چیت کے ذریعے نکالا جاتا ہے۔
شہباز شریف نے کہا کہ دہشتگردی کے خلاف قربانیاں رائیگاں نہیں جائیں گی، وطن عزیز سے ایک مرتبہ پھر دہشتگردی کے ناسور کا خاتمہ ہوگا، دہشتگردی کے خلاف جنگ میں ہمارے بہادر سپوتوں نے عظیم قربانیاں دیں۔
