لاہور میں پولیس حراست میں جاں بحق دونوں خواتین کے جسم پر تشدد کے نشانات نہیں، موت طبعی ہے، ابتدائی پوسٹ مارٹم رپورٹ سامنے آگئی۔
لاہور کے تھانہ ٹاؤن شپ میں پولیس کی زیر حراست پاکپتن کی رہائشی انمول اور آمنہ نامی خواتین 4 اگست کو پُراسرار انداز میں ہلاک ہو گئی تھیں، ابتدائی پوسٹ مارٹم رپورٹ کے مطابق دونوں خواتین کے جسموں پر سرنجز کے متعدد نشانات ہیں۔
پولیس نے دعویٰ کیا کہ شبہ ہے دونوں خواتین نے دوران حراست زہریلی گولیاں کھائیں، دونوں لاشوں سے حاصل شدہ اجزا فرانزک کے لیے بھجوا دیے گئے۔
پولیس نے مزید کہا کہ دونوں خواتین کو نوسربازی کے الزام میں پکڑا گیا تھا، دونوں خواتین کی ایک خاتون کی بالیاں اتارنے کی ویڈیو سامنے آئی، ٹاؤن شپ کی رہائشی نے 15 پر کال کرکے اُنہیں پولیس کے حوالے کیا تھا۔
پولیس کو محلے داروں نے ایک ویڈیو بھی دی تھی، جس میں دونوں خواتین کو ایک عمر رسیدہ خاتون کی بالیاں اتارتے دیکھا جا سکتا ہے، تھانے میں محرر کے کمرے میں لگے ایک کیمرے کی ویڈیو بھی سامنے آئی ہے، جس میں دونوں خواتین کو پولیس اسٹیشن میں کرسیوں پر بیٹھے دیکھا جا سکتا ہے۔
ویڈیو میں دونوں کمرے سے باہر جانے سے پہلے محرر سے باتیں کرتی دکھائی دیتی ہیں۔
