برسلز میں 5 اگست یومِ استحصالِ کشمیر کے موقع پر کشمیر کونسل یورپی یونین اور سفارت خانہ پاکستان کے مشترکہ زیرِ اہتمام تقریب منعقد ہوئی۔
یورپی پریس کلب میں ہونے والی تقریب سے ڈپٹی ہیڈ آف مشن فیصل فیاض، کشمیر کونسل یورپی یونین کے چیئرمین علی رضا سید اور دیگر مقررین نے خطاب کیا۔
مقررین نے بھارتی حکومت کے مظالم، کشمیر کی خصوصی حیثیت کے خاتمے اور آبادی کا تناسب تبدیل کرنے کی کوششوں پر شدید تنقید کرتے ہوئے کہا کہ پاکستان کشمیری عوام کی اخلاقی، سیاسی اور سفارتی حمایت جاری رکھے گا۔
انہوں نے کشمیری عوام کی استقامت کو خراجِ تحسین پیش کرتے ہوئے عالمی برادری پر زور دیا کہ اقوامِ متحدہ کی قراردادوں اور کشمیری عوام کی امنگوں کے مطابق مسئلہ جموں و کشمیر کے منصفانہ اور پرامن حل کے لیے کردار ادا کرے۔
تقریب کے آغاز پر پاکستانی قیادت کے پیغامات بھی پڑھ کر سنائے گئے جن میں کشمیریوں کے حقِ خودارادیت کی غیر متزلزل حمایت کا اعادہ کیا گیا۔
کشمیری رہنما خالد جوشی نے بھارتی مظالم کی مذمت کرتے ہوئے آزاد کشمیر کی صورتحال پر تشویش کا اظہار کیا اور مسائل کے حل کے لیے بات چیت پر زور دیا۔
تقریب میں تنازع کشمیر سے متعلق تاریخی حقائق پر مبنی دستاویزی فلم بھی دکھائی گئی۔
