وزیرِ داخلہ محسن نقوی کی زیرِ صدارت سی ڈی اے ہیڈکوارٹرز میں اجلاس ہوا جس میں اسلام آباد میں دو نئے انڈر پاسز بنانے اور جاری منصوبوں کو جلد از جلد مکمل کرنے کا فیصلہ کیا گیا۔
اجلاس کے دوران اسلام آباد کے مختلف میگا منصوبوں پر پیش رفت اور آئندہ منصوبہ بندی پر بریفنگ دی گئی جبکہ جاری اور نئے ترقیاتی منصوبوں کا تفصیلی جائزہ لیا گیا۔
وزیرِ داخلہ نے اعلان کیا کہ عوام کی سہولت اور ٹریفک کی روانی بہتر بنانے کے لیے کشمیر چوک اور فیصل مسجد پر 2 نئے انڈر پاس تعمیر کیے جائیں گے جن پر کام اگلے ماہ شروع ہو گا۔
محسن نقوی نے اسلام آباد میں ایمرجنسی 1122 کا باقاعدہ نظام نہ ہونے پر برہمی کا اظہار کرتے ہوئے ہدایت کی کہ کیپیٹل ایمرجنسی سروسز کو فوری طور پر فعال ادارہ بنایا جائے، قانونی تقاضے مکمل کر کے 4 نئے مراکز کے قیام پر ہنگامی بنیادوں پر کام شروع کیا جائے۔
اجلاس میں سی ڈی اے کے مستقل ریونیو میں اضافے، مالی خود انحصاری کے لیے دیرپا ریونیو ماڈل اور قابلِ عمل منصوبوں پر جَلد پیش رفت سے متعلق مختلف تجاویز پر بھی غور کیا گیا۔
اس موقع پر وزیرِ داخلہ نے کہا کہ ترقیاتی منصوبوں کے ساتھ ادارے کی مالی مضبوطی بھی یکساں اہمیت رکھتی ہے جبکہ ایکسپریس وے سروس روڈ منصوبہ ہر صورت مقررہ مدت کے مطابق مکمل کیا جائے۔
