یورپ بھر میں مقیم پاکستانی نژاد صحافیوں نے لندن میں ایک مظاہرے کے دوران اپنی پیشہ ورانہ ذمہ داریاں انجام دینے والے صحافیوں کو ہراساں کرنے، ان کے خلاف نعرے بازی، بدزبانی اور دھمکی آمیز رویے کی شدید الفاظ میں مذمت کرتے ہوئے اسے آزادیٔ صحافت پر حملہ قرار دیا ہے۔
صحافیوں نے اپنے مشترکہ بیان میں کہا کہ سینئر صحافی مرتضیٰ علی شاہ نہ صرف پاکستان بلکہ بین الاقوامی سطح پر بھی ایک معتبر اور باوقار صحافی کی حیثیت رکھتے ہیں، جنہوں نے کئی دہائیوں سے پیشہ ورانہ دیانت داری، غیرجانبداری اور اعلیٰ صحافتی اقدار کو برقرار رکھتے ہوئے اپنے فرائض انجام دیے ہیں۔ ان کے ساتھ پیش آنے والا ہراسانی اور غنڈہ گردی کا یہ واقعہ کسی بھی مہذب اور جمہوری معاشرے میں قابل قبول نہیں۔
بیان میں کہا گیا کہ صحافیوں کو اپنی پیشہ ورانہ ذمہ داریاں ادا کرنے سے روکنے یا انہیں خوفزدہ کرنے کی کوششیں نہ صرف آزادیٔ صحافت بلکہ جمہوری اقدار اور اظہارِ رائے کی آزادی کے بھی منافی ہیں۔ صحافی معاشرے کی آنکھ اور کان ہوتے ہیں اور ان کا بنیادی فرض غیرجانبداری کے ساتھ عوام تک درست اور مستند معلومات پہنچانا ہے۔
صحافیوں کا کہنا تھا کہ اگر کسی کو کسی صحافی کی رپورٹنگ یا رائے سے اختلاف ہو تو اس کے اظہار کے لیے مہذب، قانونی اور جمہوری ذرائع موجود ہیں۔ اختلافِ رائے کو بدزبانی، دھمکیوں اور ہراسانی کی شکل دینا ہرگز قابل قبول رویہ نہیں اور اس کی ہر سطح پر حوصلہ شکنی ہونی چاہیے۔
بیان میں مزید کہا گیا کہ مرتضیٰ علی شاہ اور دیگر صحافیوں کے ساتھ پیش آنے والا واقعہ آزادیٔ صحافت پر ایک افسوسناک حملہ ہے، جس کی جتنی بھی مذمت کی جائے کم ہے۔
یورپ بھر میں مقیم پاکستانی نژاد صحافیوں نے برطانیہ کے قانون نافذ کرنے والے اداروں سے مطالبہ کیا کہ واقعے کی مکمل، شفاف اور غیرجانبدارانہ تحقیقات کی جائیں، ملوث افراد کو قانون کے مطابق انصاف کے کٹہرے میں لایا جائے اور اس امر کو یقینی بنایا جائے کہ آئندہ کسی بھی صحافی کو اپنی پیشہ ورانہ ذمہ داریاں انجام دیتے ہوئے ایسے ناخوشگوار حالات کا سامنا نہ کرنا پڑے
