گلاسگو یونیورسٹی کی ایک تازہ ترین تحقیق کے مطابق کسی ایک جگہ پر مسلسل آدھے گھنٹے سے زیادہ بیٹھے رہنا کینسر کے خطرے میں اضافے کا باعث بن سکتا ہے جبکہ جتنا زیادہ وقت مسلسل بیٹھ کر گزارا جائے یہ خطرہ بھی اتنا ہی بڑھتا جاتا ہے۔
سائنس دانوں کا کہنا ہے کہ جب لوگ وقفے وقفے سے کسی بھی معمولی کام یا سرگرمی کے لیے اپنی جگہ سے اٹھتے ہیں تو اس سے اس خطرے میں تقریباً 20 فیصد تک کمی آ سکتی ہے۔
ماہرین کے مطابق تھوڑے تھوڑے وقفوں کے بعد روزمرہ کے کسی بھی کام کے لیے اٹھنا اور جسم کو حرکت دینا صحت کے لیے نہایت مفید ہے۔
تحقیق میں یہ بھی بتایا گیا ہے کہ مسلسل طویل عرصے تک بیٹھے رہنے کا تعلق نہ صرف کینسر بلکہ دل کی بیماریوں کے بڑھتے ہوئے خطرے سے بھی ہے۔
یہ تحقیق گزشتہ بارہ برس کے دوران 91 ہزار افراد پر کی گئی، جن کی معمولی سے معمولی جسمانی حرکات کا ریکارڈ رکھنے کے لیے ان کی کلائیوں پر خصوصی ٹریکنگ ڈیوائسز لگائی گئی تھیں۔
ماہرین کا کہنا ہے کہ موجودہ طبی رہنما اصول زیادہ تر شدید (Vigorous) یا معتدل (Moderate) ورزش پر زور دیتے ہیں، لیکن اس نئی تحقیق سے ظاہر ہوتا ہے کہ ہلکی پھلکی جسمانی حرکت، جیسے وقفے وقفے سے اٹھ کر چلنا یا معمول کے کام کرنا بھی صحت کے لیے نمایاں فوائد رکھتی ہے اور سنگین بیماریوں کے خطرات کو کم کرنے میں اہم کردار ادا کر سکتی ہے۔
